नेवासा
मुळा धरणाच्या उजव्या कालव्यावरील लघुवितरिकास्तरीय १६६ सहकारी पाणी वापर संस्थांच्या निवडणुक कार्यक्रम निवडणुक निर्णय अधिकारी तथा कार्यकारी अभियंता मुळा पाटबंधारे विभाग अहमदनगर कु.सायली पाटील यांनी जाहिर केला आहे.
मुळा धरणाचे लाभक्षेत्रातील राहुरी, नेवासा, शेवगाव व पाथर्डी या चार तालुक्यातील या १६६ पाणी वाटप संस्था असून एकूण ५० हजार ३४० मतदार आहेत.मुळा धरणाच्या उजव्या व डाव्या कालव्यांवर महाराष्ट्र सिंचन पद्धतीचे शेतकऱ्यांकडून व्यवस्थापन अधिनियम २००५ व नियम २००६ अन्वये या निवडणुका घेतल्या जाणार आहेत. निवडणूक निर्णय अधिकारी म्हणून मुळा पाटबंधारे विभागाच्या कार्यकारी अभियंता सायली पाटील यांनी शुक्रवार दि.२६ मे रोजी निवडणुकीचा कार्यक्रम जाहीर केला आहे. दि.३१ मेपासून अर्ज दाखल करता येणार आहेत.
५०० हेक्टरपेक्षा जास्त लाभक्षेत्र असणाऱ्या पाणी वापर संस्थांमध्ये
सर्वसाधारण मतदारसंघातून ९ व महिला ३ असे एकूण १२ संचालक निवडून द्यायचे आहेत तर ५०० हेक्टरपेक्षा कमी क्षेत्र असलेल्या संस्थातून सर्वसाधारण मतदारसंघातून ६ व महिला ३ असे एकूण ९ संचालक निवडून द्यायचे आहेत. निवडून दिलेल्या संचालकांची मुदत ६ वर्षांसाठी आहे. या संस्थांची मुदत स २०१९-२० मध्ये संपली होती.
मुळा पाटबंधारे विभागात राहुरी, घोडेगाव, नेवासा, चिलेखनवाडी व अमरापुर अशा ५ उपविभागांमध्ये एकूण ७ हजार ५०० सभासद आहेत. उजव्या कालव्यांवर एकूण २७९ पाणी वापर संस्था आहेत. त्यातील पहिल्या टप्प्यात १६६ संस्थांच्या निवडणुका जाहीर करण्यात आल्या आहेत. त्यानंतर उर्वरित संस्थांच्या निवडणुकांचा कार्यक्रम पुढील टप्प्यात जाहीर केला जाईल, असे कार्यकारी अभियंता सायली पाटील यांनी सांगितले.
असा आहे निवडणूक कार्यक्रम…
निवडणूक कार्यक्रम प्रसिद्ध करणे २६ मे,उमेदवारी अर्ज स्वीकारणे ३१ मे ते २ जून, उमेदवारी अर्जाची छाननी व वैध अर्जांची यादी प्रसिद्ध करणे ६ जून, उमेदवारी अर्ज मागे घेणे ८ जून, निवडणूक चिन्हाचे वाटप ९ जून, चिन्हासह यादी प्रसिद्ध करणे १२ जून, प्रचार कालावधी १३ जून ते २३ जून, मतदान व निकाल २५ जून.
*थकबाकीदार अपात्र…
महाराष्ट्र सिंचन पद्धतीचे शेतकऱ्यांकडून व्यवस्थापन कायदा २००५ मधील कलम ३३ (१) (ग) नुसार पाणी वापर संस्थेच्या सभासदांकडे पाणीपट्टीची थकबाकी असेल तर असे सभासद पाणी वापर संस्थेच्या व्यवस्थापन समितीचे संचालक म्हणून निवडणूक लढविण्यास अपात्र ठरतील. निवडणूक खर्च म्हणून प्रत्येक पाणी वापर संस्थेने ३५ हजार रुपये पाटबंधारे उपविभाग कार्यालयात निवडणूक प्रक्रिया सुरू होण्यापूर्वी भरणे आवश्यक असल्याचे निवडणूक निर्णय अधिकारी सायली पाटील यांनी सांगितले. २७९ संस्थाकडे ४ कोटी ६७ लाखांची थकबाकी आहे. केवळ १ कोटी २५ लाख रुपयांची वसुली झाली आहे.