माय महाराष्ट्र न्यूज:प्रदेशाध्यक्ष चंद्रकांत पाटील यांनी शनिवारी पेठनाका येथे पत्रकार परिषद घेतली आहे.: संभाजीराजे हे राजे आहेत. ते आमचे नेतेसुद्धा आहेत. मात्र, आपण भाजपचे खासदार आहोत का, याविषयी त्यांच्या मनात संभ्रम निर्माण झाला आहे.
राष्ट्रवादीच्या कोट्यातून खासदारकी मिळाली, असे ते समजतात. मात्र, आजही ते कागदावर भाजपचे खासदार आहेत. मराठा आरक्षणाच्या प्रश्नावर कोणीही आंदोलन करावे, आम्ही त्यांच्यासोबत राहू. मात्र, आम्हाला चालढकल मान्य नाही, असे मत प्रदेशाध्यक्ष चंद्रकांत पाटील यांनी शनिवारी व्यक्त केले.
राज्य सरकारला वाचवायचे का मराठा समाजाला, याचा अगोदर विचार करून संभाजीराजेंनी निर्णय घ्यावा. मराठा समाजाच्या आरक्षणाच्या प्रश्नावर त्यांनी वेळोवेळी बदललेली भूमिका संशय निर्माण करणारी आहे. पहिल्यांदा कोल्हापुरातून मोर्चा काढण्याची घोषणा केली. त्यानंतर आमदार-खासदारांना जाब विचारू, असे म्हटले.
आमदार-खासदारांना जाब विचारून हा प्रश्न सुटेल का, त्यासाठी सरकारला धारेवर धरावे लागेल.पाटील म्हणाले, आरक्षणाच्या प्रश्नावर मोर्चे काढण्याचा निर्णय रद्द करून तुम्ही राज्य सरकारला वाचविण्याचा प्रयत्न करीत आहात का, हेसुद्धा एकदा कळायला हवे. कधी मूक मोर्चा, तर कधी लाँग मार्च काढण्याची भूमिका घेत या प्रश्नावर चालढकल केली जात आहे, ती आम्हाला मान्य नाही.
जे कोणी मराठा आरक्षणासाठी मोर्चे काढतील, आंदोलन करतील, त्यांच्यासोबत आम्ही राहणार आहोत.राज्यातील मराठा समाजाला आरक्षण द्यायचे नाही, अशीच महाविकास आघाडी सरकारची मानसिकता आहे. मराठा आणि ओबीसी आरक्षणात या सरकारने राज्याचा बट्ट्याबोळ केला आहे, अशी टीका भाजपचे प्रदेशाध्यक्ष आमदार चंद्रकांत पाटील यांनी केली
