नेवासा
सिनेअभिनेत्री शिल्पा शेट्टी यांनी पती राज कुंद्रा व परिवारासह शनिशिंगणापूरला भेट देऊन उदासी महाराज मठात अभिषेक केला.
शुक्रवार दि.१८ एप्रिल रोजी सायंकाळी पाच वाजता शेट्टी व कुंद्रा परिवाराच्या ग्रे रंगाची व्हॅनेटी व्हॅनने थेट मंदिरात प्रवेश केला. उदासी महाराज मठात शिल्पा व राज यांनी संकल्प सोडून नंतर अभिषेक केला. चौथऱ्यावर जाऊन दोघांनी मूर्तीवर तेल अर्पण केले. विशाल कुलकर्णी यांनी पौरोहित्य केले.
जनसंपर्क कार्यालयात देवस्थानचे विश्वस्त दीपक दरंदले व माजी विश्वस्त सयाराम बानकर यांनी शिल्पा शेट्टी व राज कुंद्रा यांचा शाल, श्रीफळ व प्रसाद देऊन सत्कार केला. यावेळी शिल्पाची आई सुनंदा शेट्टी व राज कुंद्राची बहीण रिना कुंद्रा उपस्थित होते.
चौथरा व मंदिर परिसरात चाहत्यांनी सेल्फी घेण्यासाठी व हस्तांदोलन करण्यासाठी मोठ्या प्रमाणात गर्दी केल्याने सुरक्षारक्षकांना गर्दी आवरण्यासाठी कसरत करावी लागली.