माय महाराष्ट्र न्यूज: अहमदनगर शहर बॅंकेच्या बाेगस कर्जप्रकरणात याेगेश मालपाणी याला पाेलिसांनी आज सकाळी साडेनऊ वाजता चाैकशीसाठी ताब्यात घेतले. आर्थिक गुन्हे शाखेच्या पाेलीस उपअधीक्षक प्रांजल सोनवणे यांनी या माहितीला दुजाेरा दिला.
मालपाणी याच्याकडे संपूर्ण चाैकशी केल्यानंतर त्याला दुपारी बारा वाजताच्या दरम्यान अटक करण्यात आली. आर्थिक गुन्हे शाखेने त्याला न्यायालयात हजर करण्याची तयारी केली आहे. शहर सहकारी बँकेच्या बोगस कर्जप्रकरणी गुन्ह्याचा तपास अद्याप सुरूच आहे.
तीन गुन्हे :
डाॅ. नीलेश शेळके संचालित ‘एम्स’ हाॅस्पिटलमधील मशिनरी खरेदीसाठी अहमदनगर शहर सहकारी बँकेने 17 कोटी 25 लाख रुपयांचे बोगस कर्ज वाटप केल्याने डॉ. शेळके व बँकेचे संचालक मंडळ यांच्यासह 25 जणांविरुद्ध फसवणुकीचे तीन गुन्हे कोतवाली पोलीस ठाण्यात दाखल आहेत.
कर्जासाठी बनावट कागदपत्रेे:
राहुरी येथील डॉ. रोहिणी भास्कर सिनारे, श्रीरामपूर येथील डॉ. उज्ज्वला रवींद्र कवडे, नगरमधील डॉ. विनोद अण्णासाहेब श्रीखंडे हे तिघे फिर्यादी आहेत. हॉस्पिटलमध्ये भागीदार असल्याने या तीनही डॉक्टरांची बनावट कागदपत्रे, बनावट सह्या तयार करून शहर सहकारी बँकेकडून प्रत्येक डॉक्टरच्या नावावर परस्पर बोगस कर्ज मंजूर करून घेण्यात आले.
दोषारोपपत्र दाखल :
‘एम्स’ हाॅस्पिटलमधील मशिनरींचा पुरवठा याेगेश मालपाणी याच्यामार्फत झाला हाेता, हे तपासात पुढे आले आहे. डॉ. नीलेश विश्‍वास शेळके याच्याविराेधात दाखल तीन गुन्ह्यांमध्ये स्वतंत्र दोषारोपपत्र जूनच्या पहिल्या तारखेला न्यायालयात दाखल झाले आहेत.
